ВИЗАНТИСКИОТ СУЛТАН

Секогаш кога го изговарав моето име на крајот го додавав и неговото значење на арапски и се засрамував кога некој грешно ќе го изговореше последниот слог. Кога за тоа ја прашував баба ми таа процедуваше низ заби: „Тоа е името на твојот прадедо”. Моите предци започнале да се занимаваат со трговија во Трабзон и станале најбогатото семејство на Црно Море. Се уморив слушајќи како тие де- довци со „вжештени глави” по Кримската војна го потрошиле нашето богатство.

Кога по завршувањето на средното училиште во Трабзон мајка ми се запишала на Истанбулскиот универзитет на дедо ми тоа му послужило како изговор и тој да премине таму. Но, сепак, освен работите околу семејната зграда во населбата Галата и деловниот простор во Шишли, нејзе не ѝ било дозволено да се занимава со друга адвокатска дејност. Меѓу баба ми и дедо ми избиле жестоки недоразбирања кога нивната омилена ќерка се заљубила во нивниот потстанар, еден Американец. И покрај тоа мајка ми со благослов од мојот дедо се омажила за Пол Хекет, претставник на едно меѓународно деловно списание. Следната година сум се родил и јас, во една приватна болница точно на седумдесет чекори од нашата куќа. Дедо ми умрел кога сум имал две години, а само четири месеци потоа моите родители се разведуваат. Пол Хекет се вратил во својата татковина и никогаш потоа не се јавил, а ние сме се преселиле кај баба ми, во соседниот стан.

Живеевме заедно сѐ додека јас не го завршив средното училиште. За редот во домаќинството се грижеше мојата баба, а јас и мајка ми се однесувавме како разгалени детишта. На моето прашање: „Па зарем немаме ниту една фотографија од мојот татко?”, баба ми остро одговараше: „Ако сакаш да ја видиш таа битанга, погледни се во огледалото!” Но благодарение на тој мој бескорисен татко не сум ги наследил ококоравените очи, витканата коса и коњското лице на мајка ми. А кога ќе се обидеше да се дотера нејзината грдотија како уште повеќе да доаѓаше до израз. За неа би било најнормално кога не би излегувала од салонот за разубавување. Беше амбициозна и точно знаеше што сака: прекрасна комбинација од итроштина и таинственост. Како дванаест потстанари во зградите и триесет и четири во деловните простории да не ѝ беа доволно, па така за многу мали пари купи уште три згради во соседната улица.

За прераното растурање на нашето семејно гнездо придонесе врската на Пол Хекет со една привлечна Канаѓанка. Имав само осум години кога домарот, но со дозвола од мојата баба, ми го довери тоа. Мајка ми секое утро се сепнуваше кога ќе ме погледнеше. Таквата одвратност траеше сѐ до моментот кога стаса веста дека Пол Хекет умрел. Стариот психолог, еден Евреин, кај кого што ме носеа, се колнеше дека тоа е само условен рефлекс на мајка ми кон својот поранешен маж.

Никогаш не ми купуваше играчки, не ми правеше роденденски забави, а ниту, пак, ми помагаше во решавањето на домашните задачи. Некое време се сомневав дека на тој начин таа му се одмаздува на својот поранешен сопруг. Секогаш кога ќе ми затребаше некаква помош во врска со учењето јас одев кај „Господарот на Галата”, Еугенио Џени. Овој Левантинец1, кого дојденците од Анадолија го нарекуваа „Чичко Енгин”, беше професор по историја на уметност. Од овој мудар човек, кој откако знам за себе ми личеше како да има шеесет години, научив како да ги проучувам енциклопедиите, дел по дел, да ги запомнувам речниците, да распознавам различни архитектонски правци само врз основа на фасадата од напуштените камени градби, да му наредувам на морето и да му поставувам загатки на небото.

399 ден

Автор: Селџук Алтун
Издавач: Икона
Димензии: 264стр. 13х120 cm
Тежина: 250 гр.
ОПИС

При одбраната на Цариград од отоманските освојувачи во 1453 година, загинал царот Константин XI, а неговото тело никогаш не е пронајдено. Легендата вели дека пребегнал со брод на трговци
од Џенова, на тој начин избегнувајќи сигурна смрт,
и станал Бесмртен цар. Пет века подоцна, тројца мистериозни мажи се поврзуваат со младиот професор од Истанбул, како членови на тајно друштво, коешто наследството на Бесмртниот цар им го пренесува
на идните генерации и му обзнануваат дека тој
ја продолжува владејачката лоза. За да ја преземе контролата над огромното богатство, ќе мора да ги исполни последните желби на своите предци: да помине низ тешки и пред сè мистериозни обреди за иницијација, коишто ќе ја стават на сериозна проба силата не неговата волја.

Во стил на Умберто Еко, Алтун ни ги открива најскриените мистерии на древниот Константинопол и современиот Истанбул, испреплетувајќи ги историјата и фикцијата во неразмрсиво раскажувачко клопче коешто го остава читателот без здив сè до возбудливиот расплет.

Продавница
0 items Кошничка

Кошничка

Затвори

Најава

Затвори

Scroll To Top
Facebook Twitter Pinterest WhatsApp WhatsApp Telegram Viber