ХРИСТИЈАНСТВОТО ВО МАКЕДОНИЈА Историјата како иконостас

Отец Стефан Санџакоски, е роден во Струга на 03.09.1956. Во 1983 г. ги завршува студиите на Теолошкиот факултет во Белград. Во пери- одот од 1985 г. до 1988 г. се наоѓа на постдипломски студии во Париз на Православниот Теолошки институт ′′Св. Сергеј Радоњежки′′. Во 1990 г. e избран за професор на Теолошкиот Факултет во Скопје на Катедрите по Патрологија, Философија, Христијанска етика со аскетска теологија и Психологија. Магистрира во1995 г., а 1997 г. докторира на универзитетот во Скопје.

Автор е на многу научни трудови објавени во домашни и странски списанија, како и на книгите Богомислие, Беседи од Калишта, Икони на Ноуменот, Покрови на преданието и Апофатичка философија.
...Во новиот период, Православната Црква на Балканот влезе длабоко разединета од национализмот и со загубена свест за својата универзална мисија. Разрдобена на малечки светови од т.н. провинцијализам на локалните преданија. Трагедијата на овој период се состоеше во тоа што се затрова националната самосвест на православните народи со непријателство спрема другите народи. Анимозитетот на меѓунационалните конфликти го проголта живото единство на Црквата, од тогаш наваму постоечко само на теоретски план. И се случи нешто пострашно од тоа. Самата Црква престана да биде носителка на просветителскиот христијански идеал и стана генератор на религиозниот национализам. Тој до денес ги разнебитува православните балкански народи. Повикана со силата на Духот и Вистината да ги просветува сите и сé во светот, Црквата и самата им се потчини на плотта и крвта...

Провоцирајќи го нашето сетило за историчност, нашата историска свест, но и воведувајќи не во подзаборавените но непобитни вистини на нашето милениумско постоење, овие две студии на отец Стефан Санџакоски се приопштуваат на вниманието на нашата јавност како нешто отрезнувачко и полезно. Личностите и идеите кои струјат низ страниците на оваа книга го образуваат вечноживиот и нетлен иконостас на македонската и сечовечката историја.
Методиј Златанов