ЗА ЖИВОТОТ НА МОЈСЕЈ ЗАКОНОДАВЕЦОТ

ЗА СОВРШЕНСТВОТО ВО ДОБРОДЕТЕЛТА

...Ете ти го тебе, човеку Божји Кесариј, моето кратко слово за совршенството на добродетелниот живот. Го опишав животот на Мојсеј како образец на прекрасното, за секој од нас, грижејќи се да му подражава, да може во себе самиот да го запечати образот на нам пројавената убавина. А дека Мојсеј се здобил со совршенство достапно за човекот - какво сведоштво за нас може да биде поубедливо од Божествениот глас кој му рекол: Те знам повеќе од сите останати. Самиот Бог го нарекувал пријател Свој. А кога сметал дека е подобро да умре со сите останати, ако Божеството по Својата долготрпеливост не им ги прости прегрешенијата, престанал гневот Божји на Израилците, бидејќи Бог го изменил Својот суд, за да не го натажи пријателот. Сето тоа служи како сведоштво и доказ дека Мојсеј во својот живот го достигнал највисокиот степен на совршенство.

Бидејќи цел на нашето разгледување беше, - да се определи во што е совршенството на добродетелниот живот, и во нашиот труд го најдовме тоа совршенство, време е, благодарен пријателу, да се свртиме кон овој пример и кон оние духовни толкувања кои ги увидовме во раскажувањето, за пренесувајќи го сето тоа во сопствениот живот, да бидеме познаени од Бога и да Му станеме пријатели. Во тоа и се состои вистинското совршенство, во животот да се воздржуваме од злото сосем не од ропски страв пред казната и да правиме добро не од надеж за награда, одејќи по патот на добродетелниот живот од ситната сметка за полза. Но во тоа, да гледаме над (преку) сите добра кои ни се ветени, да се плашиме само од едно: да го уништиме пријателството со Бога, - ова пријателство да го сметаме за единствена посакувана драгоценост: ете во што, според мене, и се состои совршениот живот.