Црната кутија: утопија за дополнителната стварност

Романот Црната кутија, награден со наградата „Борислав Пекиќ“, претставува возбудлив и одлично напишан еколошки трилер за уништувањето на културното наследство, за загадувањето со нуклеарен отпад и за забрзаната потрошувачка на иднината.

Во средиштето на овој интригантен роман се наоѓа течението на реката Дунав, од Виена до Белград. Високата политика, високата наука и високиот криминал се во најдлабоко содејство, при што некои од најважните европски археолошки наоѓалишта во нашето време стануваат точки на кои се депонира нуклеарен отпад. Станува збор за возбудлива приказна полна со динамика и акција, со пресврти и необични откритија за екологијата и за злосторството, за утопистите, љубовта и предавството, како и за мала група завереници која со утопија се обидува да го одбрани својот свет.